जीवनको सबैभन्दा बहुमूल्य निधि : ख्रीष्टमा शान्ति लेखक

• पास्टर निकानोर तामाङ

शुभ प्रभात ! आज बिहानका मेरा यी सामान्य र मिश्रित विचारहरू हुन्, जसलाई यहाँहरूले ध्यानपूर्वक पढिदिनुहुनेछ र यसबाट आत्मिक लाभ उठाउनुहुनेछ भन्ने आशा गर्दछु ।

प्रार्थनाको समयमा उब्जिएको एउटा प्रश्न आज बिहान म मेरो नियमित प्रार्थना गर्दै थिएँ । ‘आज बिहान’ भन्नाले, आज २८ जुन, १९७६ को कुरा हो । नियमित प्रार्थनाको समयमा, म हरेक दिन विभिन्न विषयहरू र विभिन्न मानिसहरूका निम्ति प्रार्थना गर्ने गर्छु । त्यसैबेला अचानक मेरो मनमा एउटा कुरा आयो, जुन म आज तपाईँहरूसँग बाँड्न चाहन्छु ।

तपाईँहरूको जानकारीको लागि, जसले मलाई चिन्नुहुन्न, म निकानोर तामाङ हुँ । अहिले म ७६ वर्षको भएँ । म विगत ६० वर्षदेखि ख्रीष्टियन हुँ र ५४ वर्षदेखि निरन्तर प्रभुको सेवा गर्दै आइरहेको छु । जब म विभिन्न कुराहरूको लागि प्रार्थना गर्दै थिएँ, मेरो मनमा एउटा विचार उब्जियो र मैले आफैँलाई एउटा प्रश्न सोध्न थालेँ : तपाईँको बाँकी जीवनभरि तपाईँले आफ्नो जीवनमा सबैभन्दा बहुमूल्य निधिको रूपमा सँगाल्ने एउटा कुरा के हो ?

अब यस संसारमा बाँच्नका लागि मसँग धेरै वर्षहरू नहोलान्, तर तपाईँको बाँकी जीवनको लागि त्यो ५ वर्ष हुन सक्छ, ५ महिना हुन सक्छ, ५ दिन, ५ घण्टा वा १० वर्ष नै किन नहोस् । मैले आफैँलाई भनेँ, “मलाई केवल शान्ति चाहिएको छ । मेरो हृदयमा शान्ति ।”

शान्तिको खोजी र ख्रीष्टको प्रतिज्ञा

त्यसपछि मैले एक महान् सन्त, थोमस अ केम्पिसको रचना पढ्न थालेँ । उहाँ लेख्नुहुन्छ “धेरैले शान्तिको चाहना गर्छन्, तर उनीहरू त्यस शान्तिको लागि केही पनि गर्दैनन्।” यो यस्तो कुरा थियो, जसको बारेमा मैले गहिरिएर मनन गर्न थालेँ । अनि मलाई प्रभु येशू ख्रीष्टका यी वचनहरू याद आए : “म तिमीहरूलाई शान्ति दिन्छु, संसारले दिएजस्तो होइन, तर म तिमीहरूलाई दिन्छु।” मैले यस विषयमा साँच्चै गम्भीर भएर सोच्न थालेँ ।

अनि मैले आफैँलाई भन्न थालेँ, अहो ! येशूले दिनुहुने शान्ति उहाँबाट छुट्टिएको कुनै बाहिरी कुरा होइन । उहाँले त्यो शान्ति स्वयम् आफ्नै रूपमा दिइरहनुभएको छ । उहाँले भन्दै हुनुहुन्छ, “म नै तिम्रो शान्ति हुँ । अनि जब म तिमीभित्र बास गर्छु, र जब तिमीले साँच्चै आफैँलाई भन्छौ कि येशू ख्रीष्टबाहेक म अरू कुनै कुराको लालसा गर्नेछैन,” तब त्यो शान्तिले तिमीलाई पूर्ण रूपमा ढाक्नेछ । त्यो शान्ति अत्यन्तै मधुर हुनेछ । त्यस शान्तिले तिम्रो हृदयलाई यस्तो स्थिरता र कोमलता दिनेछ कि तिम्रो जीवनमा जे सुकै होस्, परिस्थिति जस्तोसुकै आओस्, तिमी अत्यन्तै आनन्दित हुनेछौ ।

आँधीबेहरीको बीचमा ख्रीष्टसँगको हिँडाइ

म यो भनिरहेको छैन कि तपाईँले आफ्नो जागिर, पढाइ, करियर वा परिवार छोड्नुपर्छ, र केवल येशू र उहाँको शान्तिमा मात्र ध्यान केन्द्रित गरेर शान्तिमय जीवन बिताउनुपर्छ। अहँ, हामीलाई त्यसरी बाँच्नका निम्ति बोलावट भएको होइन । हामीलाई त आँधीबेहरीको बीचमै बाँच्नका लागि बोलाइएको हो ।

मलाई थाहा छ, तपाईँहरूमध्ये कोही धेरै कठिन परिस्थितिहरूबाट गुज्रिरहनुभएको छ । कोही आर्थिक रूपमा, कोही सम्बन्धको हिसाबले, त कोही कामको हिसाबले अनि अन्य धेरै कुराहरूले गर्दा बोझिलो परिस्थितिहरूबाट पार हुँदै हुनुहुन्छ । एउटा परिवारको रूपमा, हामी सबै प्रकारका कुराहरूबाट गुज्रिन्छौँ । एउटा बुबा, एउटा हजुरबुबा, र एउटा श्रीमानको रूपमा, म हरेक दिन धेरै कुराहरूको सामना गर्छु । र त्योभन्दा पनि बढी, एउटा पास्टरको रूपमा, धेरै पटक अत्यन्तै कठिन समयहरूबाट पार हुनुपर्छ ।

तर मैले परमेश्वरसँग उहाँको शान्ति माग्न सिकेको छु; यसो भनौँ, उहाँलाई नै माग्न सिकेको छु । त्यसैले अहिले म तपाईँहरूलाई, विशेषगरी युवा जवानहरूलाई र अरू सबैलाई पनि के भनिरहेको छु भने, तपाईँले येशूलाई नै आफ्नो एकमात्र चाहनाको विषय बनाउनुहोस्, अनि बाँकी सबै कुराहरूको सामना गर्न तपाईँ आफैँ सक्षम हुनुहुनेछ ।

जस्तोसुकै परिस्थितिमा पनि येशूलाई पछ्याउने सङ्कल्प

हाम्रो आत्मिक यात्रामा बाटो बिराउने अवस्थाहरू आउनेछन्, लड्ने र चिप्लने अवस्थाहरू आउनेछन्, पछि हट्ने कुराहरू पनि हुनेछन् । एकै ठाउँमा उभिएर “म यो के गर्दैछु ?” भनेर सोध्ने क्षणहरू पनि आउनेछन् । सबै प्रकारका अन्योलहरूले घेर्नेछन् । तर आफ्नो मनमा यो दृढ निश्चय गर्नुहोस् कि परिस्थिति जे सुकै होस्, म येशूसँगै हिँड्नेछु ।

म धनी भएँ भने पनि, म येशूसँगै हिँड्नेछु । म गरिब भएँ भने पनि, म येशूसँगै हिँड्नेछु । म सधैँ स्वस्थ रहेँ भने, म येशूसँगै हिँड्नेछु । म अस्वस्थ भएँ भने पनि, म येशूसँगै हिँड्नेछु। यदि मेरो प्रशंसा भयो भने, म येशूसँगै हिँड्नेछु । र यदि मेरो प्रशंसा भएन तर निन्दा नै भयो भने पनि, म येशूसँगै हिँड्नेछु ।

परिस्थिति जे सुकै होस्, म येशूसँगै हिँड्नेछु किनभने मेरो जीवनमा मैले सँगालेको सबैभन्दा महत्त्वपूर्ण कुरा मेरो व्यक्तिगत शान्ति हो, र त्यो शान्ति येशू ख्रीष्टले मात्र दिन सक्नुहुन्छ ।

त्यसकारण, यदि तपाईँ जीवनका समस्याहरू, निराशा, हतोत्साह र पराजयबाट गुज्रिरहनुभएको छ भने, प्रभु येशू ख्रीष्टका यी वचनहरूमा ध्यान केन्द्रित गर्नुहोस् जसले भन्नुहुन्छ :

“संसारले दिएजस्तो होइन, म तिमीहरूलाई शान्ति दिनेछु । म तिमीहरूलाई मेरै शान्ति दिनेछु ।”

परमेश्वरले तपाईँहरू सबैलाई आशिष् दिऊन् । जयमसीह !