हामीले हाम्रो राष्ट्रका लागि अहिले के गर्न सक्छौं ?

विश्वासीहरू र मण्डलीका रूपमा हामीले हाम्रो राष्ट्रका लागि अहिले के गर्न सक्छौं ?

• मुकेश तामाङ्ग

हामीलाई यशैया ६१:१,३–४ मा एउटा प्रतिज्ञा दिइएको छ:

“परमप्रभुको आत्मा हामी माथि हुनुहुन्छ, उहाँले हामीलाई खरानीको सट्टा सुन्‍दरताको मुकुट,र शोकको सट्टा आनन्‍दको तेल लगाइदिन,निराश मनको सट्टा प्रशंसाको पोशाक पहिराइदिन। हामीहरूले पुराना भग्‍नावशेष पुनर्निर्माण गर्नेछौँ। नष्‍ट भएका ठाउँहरू हामीहरूले फेरि बनाउनेछौ, र पुस्‍तौँदेखि भग्‍नावशेष भएर रहेका सहरहरूलाई हामीहरूले फेरि नयाँ बनाउनेछौँ।

आज हाम्रो राष्ट्रका मानिसहरूलाई खरानीको सट्टा सुन्दरताको मुकुट, शोकको सट्टा आनन्द, र निराशाको सट्टा प्रशंसाको पोसाकका आवश्यक परेको छ। हाम्रो राष्ट्रका जलेका भग्नावशेष पुनःनिर्माण, अघिल्ला उजाड ठाउँहरूको पुनःस्थापना, र पुस्तौँदेखि भग्नावशेष भएका शहरहरूको निर्माणको आवश्यक छ।

वचन अनुसार, हामीलाई यसैको निम्ति अभिषेक गरिएको छ। हामीलाई खरानीको सट्टा सुन्‍दरताको मुकुट दिन, शोकको सट्टा आनन्द दिन, र निराशाको सट्टा प्रशंसा दिन पठाइएको छ। हामी नै ती मानिस हौं जसले जलेका भग्नावशेषहरू पुनःनिर्माण गर्नेछन्, अघिल्ला उजाड ठाउँहरू उठाउनेछन्, र उजाड शहरहरूको निर्माण गर्नेछन्।

नहेम्याहले प्रार्थना, साहस र धैर्यतासाथ परमेश्वरको मानिसहरूलाई नेतृत्व गरेर यरूशलेमका पर्खालहरू मात्र होइन, तिनीहरूको विश्वास र परमेश्वरप्रतिको प्रतिवद्धतालाई पनि पुनःस्थापना गरे। त्यसरी नै हामी पनि अहिले हाम्रो राष्ट्रका लागि नहेम्याह बन्नुपर्छ।

मण्डली, अब समय आएको छ—हामी एउटै ख्रीष्टको शरीर भएर उठ्नुपर्छ। आउनुहोस्, प्रार्थना, भेटि, स्रोतसाधन र परमेश्वरले दिनुभएको सीपहरू एकताबद्ध भएर प्रयोग गरौं, ताकि हाम्रो राष्ट्र पुनःनिर्माण होस्। यसो गरेमा, यशैया ६१ को प्रतिज्ञा पूरा हुनेछ र नेपालले हामीलाई देख्नेछ र परमेश्वरका जन भनेर चिन्नेछन्।

उठौं मण्डली, खराबिलाई भलाईले जित्ने समय यही नै हो।