ख्रिष्टियन जीवनमा द्वैध चरित्रको खतरा (उत्पत्ति २७:२२)

• डा . शिवहरि भट्टराई

“याकूब आफ्‍ना पिताको नजिकै गए, र इसहाकले तिनलाई छामेर भने, ‘सोर त याकूबको हो, तर हातहरू त एसावकै हुन्‌ ।” उत्पत्ति २७:२२

१. प्रसङ्ग (Context of the Passage)

यो घटना वृद्ध Isaac, उनका दुई छोरा याकुव (Jacob) र एसाव (Esau) बीचको हो । इसहाकले जेठो छोरा एसावलाई आशिष दिन चाहन्थे । तर आमा रिवेका (Rebekah) को योजनामा याकूबले एसावको भेष धारण गरे । उनले एसावको लुगा लगाए, हातमा जनावरको छाला बेरे ताकि इसहाकले छाम्दा एसाव जस्तो महसुस होस् । जब याकूब इसहाककहाँ पुगे, इसहाक अलमलमा परे । सोर याकूबको थियो तर हात एसावका थिए । यहाँ एउटा गहिरो आत्मिक शिक्षा छ: बाहिरी स्वरूप र भित्री वास्तविकता नमिल्नु ।

आज पनि धेरै विश्वासीहरूको जीवन यस्तै हुन सक्छ — मुखले ख्रिष्टियन, व्यवहारले संसारिक; वचनले पवित्र, जीवनले अपवित्र ।

२. द्वैध चरित्र (Double Character) भनेको के हो ?

द्वैध चरित्र भनेको एउटा देखाउने र अर्को जीउने जीवन हो । मण्डलीमा पवित्रताको भाषा बोल्ने तर व्यक्तिगत जीवनमा बेइमानी गर्ने प्रार्थना गर्ने मानिस जस्तो देखिने तर हृदयमा रिस, ईर्ष्या, घमण्ड, स्वार्थ पाल्ने । याकूबको स्वर याकूबकै थियो, तर हात एसावका थिए । आज प्रश्न यो छ : हाम्रो स्वर र हात मिलेको छ कि छैन ? हामीले बोल्ने विश्वास र हामीले जिउने जीवन एउटै छ कि छैन ?

३. द्वैध चरित्रका चिन्हहरू

(क) ओठमा विश्वास, व्यवहारमा अविश्वास आफूलाई ख्रिष्टियन भन्ने तर निर्णय संसारिक तरिकाले गर्ने । पवित्र बाइबलमा लेखिएको छ:
“यी मानिसहरूले ओठले मलाई आदर गर्छन्, तर तिनीहरूको हृदय मबाट टाढा छ।” (मत्ती १५:८)

(ख) मण्डलीमा एउटा अनुहार, घरमा अर्कै अनुहार मण्डलीमा नम्र, घरमा क्रोधी; बाहिर सेवक, घरमा कठोर ।

(ग) पवित्रताको कुरा गर्ने, तर लुकेर पाप गरिरहने गोप्य जीवनमा पाप पालेर सार्वजनिक जीवनमा धार्मिक देखिन खोज्नु ।

४. द्वैध चरित्रको खतरा

(क) यसले आत्मिक आशिष खोस्छ याकूबले आशिष पाए तापनि छलका कारण परिवारमा दुःख, भागदौड र विभाजन आयो । पापद्वारा प्राप्त उपलब्धिले शान्ति ल्याउँदैन।

(ख) यसले साक्षी बिगार्छ जब विश्वासीको जीवन र वचन मिल्दैन भने, समाजले ख्रिष्टलाई दोष दिन्छ ।

(ग) यसले परमेश्वरलाई प्रसन्न पार्दैन परमेश्वरले बाहिरी रूप होइन, हृदय हेर्नुहुन्छ । “मानिसले बाहिरी रूप हेर्छ, तर परमप्रभुले हृदय हेर्नुहुन्छ।” (१ शमूएल १६:७)

५. ख्रिष्टियन जीवनमा सत्य चरित्र कस्तो हुनुपर्छ ?

(क) स्वर र हात एउटै हुनुपर्छ हामीले बोल्ने विश्वास र गर्ने काम मिल्नुपर्छ । प्रार्थना गर्छौं भने क्षमा पनि गर्नुपर्छ । प्रेमको शिक्षा दिन्छौं भने प्रेम पनि देखाउनुपर्छ । पवित्रताको प्रचार गर्छौं भने पवित्र जीवन पनि जीउनुपर्छ ।

(ख) बाहिरी होइन, भित्री परिवर्तन ख्रिष्टियन जिवन कपडा वा भाषा होइन, हृदयको रूपान्तरण हो ।

(ग) पश्चाताप र इमानदार जीवन यदि हाम्रो जीवनमा द्वैधता छ भने, परमेश्वरले आज पनि पश्चातापको ढोका खोल्नुहुन्छ ।

६. आत्म-परीक्षणका प्रश्नहरू के मेरो निजी जीवन र सार्वजनिक जीवन एउटै छ ? के मेरो बोली र व्यवहार मिल्छ ?

के म मण्डलीमा एक व्यक्ति र घरमा अर्को व्यक्ति त होइन ? यदि मानिसहरूले मेरो “हात” छामे भने, के मेरो “सोर”सँग मिल्छ ?

निष्कर्ष

इसहाकले भने : “सोर त याकूबको हो, तर हातहरू एसावका हुन् ।”

आज परमेश्वरले हाम्रो जीवनलाई हेर्दै हुनुहुन्छ । के हाम्रो विश्वास केवल स्वरमा छ, कि हातमा पनि ? के हाम्रो ख्रिष्टियन जिवन केवल भाषणमा छ, कि व्यवहारमा पनि ? परमेश्वरले द्वैध चरित्र होइन, निष्कपट र सत्य जीवन चाहनुहुन्छ ।

अन्तिम चुनौती:

“तपाईंको स्वर याकूबको छ भने, तपाईंका हात पनि याकूबकै होऊन् — अर्थात् तपाईंले बोल्ने विश्वास तपाईंको जीवनमा देखियोस् ।”

समापन प्रार्थना :
“हे परमेश्वर, हाम्रो जीवनबाट कपट, दोहोरोपन र द्वैध चरित्र हटाइदिनुहोस्। हामीलाई यस्तो विश्वासी बनाउनुहोस् जसको बोली र व्यवहार, विश्वास र जीवन, मण्डली र घर—सबैमा एउटै ख्रिष्ट देखियोस्। येशूको नाममा, आमेन ।”