पा. प्रवजन शाही , संस्थापक, गुड न्यूज नेपाल
मानिस पापी छ र उसमा भएको पापी स्वभावका कारण उसले जानीनजानी पाप गरी नै रहन्छ । हामीले दैनिक जीवनमा आफूलाई चाहिएका कुराको मूल्य चुकाउनु पर्छ । यस भनाईलाई एउटा उदाहरणद्वारा प्रष्ट रुपमा बुझ्न सक्छौं । जस्तै हामी बजारमा कपडा किन्न जान्छौ, त्यो कपडामा त्यसको मूल्य छुट्याएको हुन्छ । यदि कुनै व्यक्तिले त्यो कपडा लिन चाहन्छ भने उसले त्यो कपडाको मूल्य चुकाउनु पर्छ। त्यसै गरी हामीले गरेको पापको पनि मूल्य चुकाउनु पर्ने थियो । तर त्यसको मूल्य चाहिँ हामीलाई अति प्रेम गर्ने येशू ख्रीष्टले चुकाईदिनु भयो । अर्थात् येशू खीष्ट संसारमा आउनुको पहिलो कारण तपाई हामीले गरेको पापको मूल्य चुकाउनु हो ।
मानिसले आ-आफ्नो क्षमता र दक्षता अनुसारको कामहरु गर्ने गर्छन र सबैले आफ्नो काम अनुसारको ज्याला पाउने गर्छन् । हामीले गरेको पापको पनि ज्याला छ । अनि त्यो ज्याला चाँही मृत्यु हो । बाइबलले बताउँछ कि, पापको ज्याला मृत्यु हो खासगरी मृत्यु भन्नाले नरकमा पर्नु हो। -रोमी ६:२३
पाप गरेपछि मृत्यु भोग्नैपर्छ । तर येशू खीष्टले तपाई हामीले भोग्नुपर्ने मृत्यु आफैले भोगेर तपाई हामीप्रतिको उहाँको प्रेमको स्पष्टिकरण दिनुभयो । यसकारण जतिले येशू खीष्टमाथि विश्वास गर्छन्, परमेश्वरले तिनीहरुलाई अनन्त जीवन (स्वर्गमा प्रवेश हुन) दिनुहुन्छ । यस प्रकारले येशू ख्रीष्ट संसारमा आउनुको दोश्रो कारण तपाई हामीले गरेका पापको ज्याला चुक्ता गरिदिएर तपाई हामीलाई अनन्त जीवन दिन हो ।
एक जना विद्वानले भनेका छन् कि यो संसारको मुख्य समस्या यदि आर्थिकको भएको भए परेमश्वरले संसारमा एक अद्भूत अर्थविद्लाई पठाउनुहुने थियो । यदि यो संसारको मुख्य समस्या शिक्षा भएको भए उहाँले एक अद्भूत शिक्षाविद्लाई पठाउनुहुने थियो । तर यो संसारको मुख्य समस्या पाप र अधर्म भएको कारणले परमेशवरले सम्पूर्ण मानव जातिको उद्धार र मुक्तिको लागि एक सत्य उद्धारकर्ता र मुक्तिदाता येशू खीष्टलाई पठाउनु भयो र येशू खीष्टकै माध्यमद्वारा मात्र येशूको नाममा पाप पश्चातापको प्रार्थना गर्ने मानिसले मात्र उद्धार र मुक्ति प्राप्त गर्ने छन् । यो नै येशू ख्रीष्ट संसारमा आउनुको तेश्रो कारण हो ।
यसरी उहाँले तपाई हामीलाई प्रेम गरको कारणले प्रशस्तताको अनन्त जीवन दिन आउनु भएको हो । -यूहन्ना १०:१०, तपाई हामीले अँध्यारो एवम् उज्यालोमा जानेर वा नजानेर गरेका पापको ज्याला चुक्ता गर्नु सम्पूर्ण मानव जातिलाई उद्धार र मुक्ति दिन संसारले हराएको आशालाई ख्रीष्टको क्रूशको मृत्युद्वारा फिर्ता गर्न र मानव जातिलाई नै पवित्र परमेश्वरसँगको घनिष्ट सम्बन्धमा फेरि जोड्नका लागि कहिल्यै पाप नर्गुभएको पवित्र येशू ख्रीष्ट संसारमा आई क्रूशमा पूर्ण बलि हुनुभयो ।
