हालसालै बेलायत, भारतको सिलोङ, नेपालको प्रदेश नम्बर १स्थित इटहरी लगायतका ठाउँहरूमा आयोजित विभिन्न कार्यक्रमहरूमा आफ्नो प्रस्तुति दिएका नेपालका प्रख्यात ब्याण्ड हेब्जिवाह संङ्गीत झुण्डसँग गरिएको कुराकानी यहाँ प्रस्तुत गरिएको छ ।
हालसालै युके पुगेर तपाईंहरू आफ्नो प्रस्तुति दिएर आउनु भयो, समग्रमा युकेको कार्यक्रम कस्तो भयो ?
ऐतिहासिक र कार्यक्रम आयोजक र हामी दुबै पक्षको लागि एकदमै राम्रो भयो । युरोपियन देशमा कसैले बोलाएर गएको यो पहिलोचोटी हो । साउथ इङ्ल्याण्डका करिव ७०० जना युवाहरू भेला भएको यो कार्यक्रम ग्रीन फिल्ड भन्ने ठाउँमा २०१९ अक्टोवर २६ तारिखमा भएको थियो । सो कार्यक्रममा युकेको सबै ठाउँका युवाहरू भेला भएका थिए । कार्यक्रमको दोस्रो भाग पछि प्रायः सबै समय हेब्जिवाह ब्याण्डलाई दिइएको थियो र त्यहाँको लोकल संगीत झुण्डले पनि आफ्नो प्रस्तुति दिएको थियो । हामीले १०–१२ वटा भजन, गीत गाएर अन्तिममा स्तुति प्रशंसा गरेर कार्यक्रम सम्पन्न गरियो ।
त्यहाँ जाने अवसर कसरी प्राप्त भयो ?
धेरै पहिलादेखि एकजना भाइसँग हाम्रो कुरा भइराखेको थियो । हामी त्यहाँ जानलाई सितकुमार राई, कल्याण गुरुङ, खुपेन सुनुवार र उहाँको श्रीमती शर्मिला सुनुवार, एन.सी.सी युके र ख्रीष्टियन नेपाली चर्च मिलेर हामीलाई धेरै सहयोग गर्नुभयो ।
त्यहाँ कति समय बस्नुभयो ?
हामी करिव १३–१४ दिनको लागि युकेमा थियौं । विशेषगरी २६ तारिखका दिन केन्ट भन्ने ठाउँमा ठूलो कार्यक्रम गर्न पायौं । पछि वरिपरि रहेका अरु चर्चहरूले पनि हामीलाई बोलाउनुभयो । आइतबारको सेवा र घरेलु संगतिमा पनि हामी गयौं । हामीले त्यहाँको समय एकदमै ब्यस्त हुने गरी बिताउन पायौं ।
पछि सिलोङ पनि जानुभयो, त्यहाँ भएको कार्यक्रमका बारे केही भन्नुहुन्छ कि ?
सिलोङ जाने हाम्रो पहिलेदेखिको नै योजना थियो र चाइल्ड मिसन भन्ने सानो झुण्डसँग सहकार्य गरेका थियौं । भारतमा धेरै ठाउँमा कार्यक्रम गरिसकेका छौं तर अहिले गरेको कार्यक्रम एकदमै सफल भयो । करिव ८०० जना युवाहरू र विभिन्न स्थानबाट आएका विश्वासीहरू यो कार्यक्रमबाट आशिषित भएका थिए ।
नेपालको प्रदेश नं १ को इटहरीमा आयोजित कार्यक्रम कस्तो भयो ?
यो कार्यक्रम पनि एकदमै सफल भयो । विशेष गरी प्रदेश नं १ का मुख्य मन्त्री माननीय शेरधन राई लगायत क्षेत्रीय सभासद्को उपस्थिति थियो । उहाँहरूले आफूबाट अरु धर्मालम्बीहरूलाई जस्तै ख्रीष्टियनहरूलाई पनि साथ र सहयोग रहने र केही पर्दा हरपल सहयोग गर्न तयार रहेको बताउनुभयो । हामीले ख्रीष्टमस भजन गीत संगीत साथै अरु गीतहरू पनि गायौँ । हाम्रो लागि यो एकदमै राम्रो अवसर थियो र सु–समाचार सुनाउने पनि राम्रो समय मिल्यो ।
हेब्जिवाह म्युजिक सेन्टर किन खोल्नुभयो र कसरी चलिरहेको छ ?
हाम्रो उद्देश्य जवानहरूलाई प्लेटर्फम दिने र म्युजिकबाट सेवकाइ गर्ने हो । म्युजिक सेन्टरमा ८० जना जति विद्याथीहरू छन् । स्टुडियोमा रेकर्डिङ पनि चलिरहेको छ । प्राक्टिस रुम पनि घण्टाको ३०० रुपैयाँमा दिने गरेका छौं । चर्चहरूलाई आवश्यक पर्ने गुणस्तरीय सामसनका साउण्ड सिस्टमहरू एकदमै सुपथ मुल्यमा दिइरहेका छौं । चर्चको बजेटमा आउने भएकोले बजारको भन्दा सस्तोमा दिइरहेका छौं । महिनामा ७–८ वटा कार्यक्रमहरू भइराख्ने भएकोले ब्यस्त पनि भएका छौं ।
आगामी दिनका योजनाहरू के के छन ?
अष्ट्रेलिया र अमेरिका अप्रिलतिर जाने योजना छ । नेपालका पनि बिभिन्न कार्यक्रमहरू समावेश छन् । बाल सङ्गति सेवकाइ, म्युजिक सेवकाइ, साउण्ड सिस्टम ट्रेनिङ, रेकडिङ् तथा मिक्सिङ ट्रेनिङहरू सञ्चालन भइरहेका छन् ।
अन्तमा के भन्न चाहनुहुन्छ ?
बिगत २० वर्षदेखि गीत संगीतद्वारा प्रभुलाई महिमा र प्रशंसा दिइरहेका छौं । कुनै पनि कुरा भन्ने बित्तिकै तुरुन्त हुँदैन त्यहि कारणले गर्दा निराश र हतास नहुनुहोस् । जब प्रभुले दिनुभएको कुरामा लामो समयसम्म इमान्दारी भएर लाग्छौं भने उहाँले हामीलाई उहाँको समयमा उठाउनु हुन्छ । प्रभुसँग छोटो होइन लामो सम्बन्ध राख्यौं भने उहाँले हामीलाई पक्कै पनि आशिष दिनुहुन्छ । प्रभुले हामीलाई जे बरदान दिनुभएको छ, त्यसमा लगनशिल भएर लागौं र ती बरदानबाट नै हामी सबैले प्रभुको महिमा र प्रशंसा गरौं ।
